فصل أمن دولة . قصة

كلنا عارفين إن ضباط أمن الدولة كانوا من الفاشلين دراسيا و لذلك فهم أغبياء جدا في التعامل مع أي حد .. طبعا الكلام ده ضايق الرجالة الكبار فقالوا احنا عايزين نأخد فصل المتفوقين في أحد المدارس و نربي العيال تربية معينة بحيث أنهم يطلعوا ضباط أمن دولة .. لكن الطلاب دول منفعوش لأن كل واحد فيهم طلع عايز يشتغل شغلانة محترمة حاططها في دماغة ونفسه يحقق حلمه .. الرجالة الكبار طبعا اتفاجؤوا بالخبر فاضطروا انهم يعملوا فصل للفاشلين دراسيا و هما دول اللي هيتربوا على تربية أمن الدولة عشان يبقوا ضباط أمن دولة .. و احنا هنا هنشوف يوم في الفصل الغريب ده .. هيحصل فيه ايه
دخل الأستاذ المعين من أمن الدولة إلى الفصل في أول أيام الدراسة فلم يجد إلا طالب واحد نايم في آخر الفصل و غارس المطوة في الديسك .. فذهب الأستاذ في خوف شديد لإيقاظ هذا الطالب
الأستاذ : أنت يا حبيبي ! ..... يا ابني ..... اصحى
حموكشة (يتثاءب و يرد ) : الله يخرب بيت أبو كده .هو الواحد ميعرفش ينام في الفصل ده .. فيه ايه يا عم
الأستاذ : يللا يا ابني دي أول حصة في السنة
حموكشة : و حياة أبوك ؟ ده أنا نايم هنا من أول ما الأجازة بدأت
الأستاذ : أنت شكلك شارب حاجة .. طب ممكن تشيل المطوة دي عشان أعرف اتكلم براحتي
حموكشة : ماشي يا باشا . متخافش . أنت شكلك نايتي خالص
الأستاذ : فين يا حموكشة بقيت زمايلك
حموكشة : و الله ما أعرف . أنا نايم هنا تقريبا من أول ما الأجازة بدأت زي ما قلت لك . خد موبايلي أهو و خد منه النمرة اللي انت عايزها لأن معييش رصيد
( الأستاذ يكلم بقية الطلبة ويستغرق الأمر 3 ساعات كاملة لحضور الــ 10 طلاب إلى الفصل )
عطوة : معلش يا أستاذ و الله أنا آسف ع التأخير .. أصل انا كنت بأهرب أبويا وعمي م السجن اللي حنب المدرسة
زيكو : وأنا كنت بأوثق عملية الهروب دي فيديو عشان احنا سمعنا إن قناة الجزيرة بتعمل مسابقات للأفلام الوثائقية و بيقولوا الجوايز ممكن نشتري بيها عيش لمدة سنة كاملة .. آه والنبي
الأستاذ : بصوا يا ولاد .. أنا عايزكم تسمعوني كويس .. أنتوا هنا مش عشان تدرسوا .. أنتوا هنا عشان تبقوا ضباط أمن دولة
( يغمز الطلاب لبعضهم البعض ثم ينظرون للأستاذ و يقولون قفي صوت واحد ) : قشطة
الأستاذ : فيه حد هنا يا أولاد دخل السجن قبل كده ؟
باكابوظا : أنا نشأت واتربيت و اتخرجت و خدت الدبلوم م السجن
الأستاذ : نهارنا أبيض ان شاء الله
( يرن الجرس ليعلن انتهاء الحصة الأخيرة )
يبدأ الطلاب في إخراج أشياء غريبة من الدرج تبين للأستاذ أنها أكياس الحشيش . يجلسوا على شكل دائرة ليلفوا الحشيش ويدخنوه
باكابوظا : اتفضل يا أستاذ ... أنت واقف مبحلق كده ليه .. اتفضاااااااااال
الأستاذ : لا لا لا شكرا لسه واكل .. أقابلكوا بكره ان شاء الله بس أبوس رجليكوا تيجوا بدري ده احنا مقعدناش غير حصة واحده
( يخرج الأستاذ من الفصل ويسند ظهرة على الحيطة ويتنهد تنهيدة طويلة .. و يقول في سره " شكلنا هنتعب مع بعض")
و إلى اللقاء في حصة أخرى أو بوست آخر

تغيير كل حاجه .. انسى اللي فات

أنا مش زي ما أنا كاتب في البوست الاول خالص . آسف على اللخبطة الجامدة دي معلش سامحونا . أنا كنت بس بشوف ردة الفعل و المدونة دي ان شاء الله تكون ظريفة . و الله أنا فرحت من التعليقات . يبدو أن الشباب فايق . وانتظروني في المدونة الكوميدية . مدونة أمن الدولة .

من أولها كده

من أولها عشان تعرفوا أنا مين.أنا مواطن مصري ضد أي جماعات إسلامية و ضد الفكر الإسلامي انه يدخل الحكومة والسياسة لكن يكون في المسجد ماشي.و ممكن تقول فكري عالماني ليبرالي.يعني مسلم و بأصلي و بأصوم.زي الناس اللي عامله نفسها متدينة دي وهما لا مؤاخذه في الغالب منافقين وعايزين الحكم و السلطة.و بأشجع الرئيس مبارك في مشاريعه التنميوية و مشواره السلمي و نفسي أشوف مصر متصلحة بأيدي العلمانيين زي ما حصل في تركيا